स्व. विष्णुपंत (तात्यासाहेब) कोठे यांच्या ८९व्या जयंतीनिमित्त सेवाभावी उपक्रम; विद्यार्थ्यांना वह्या, ड्रेस अन् खाऊचे वाटप
सोलापूर व्हिजन | सोलापूर दि.७ ऑगस्ट
स्व. विष्णुपंत (तात्यासाहेब) कोठे यांच्या ८९व्या जयंतीनिमित्त विविध सामाजिक उपक्रमांचे आयोजन करण्यात आले आहे. शिक्षण आणि समाजसेवेची परंपरा पुढे नेत विद्यार्थ्यांना शैक्षणिक साहित्य तसेच गरजू विद्यार्थ्यांना ड्रेस व खाऊचे वाटप करण्यात येणार आहे.
‘विचार अमर असतात; ते पिढ्यान्पिढ्या प्रेरणा देत राहतात’ या विचारातून जयंतीनिमित्त हा उपक्रम राबविण्यात येत आहे. समाजातील गरजू विद्यार्थ्यांना शिक्षणासाठी आवश्यक साहित्य उपलब्ध व्हावे आणि त्यांच्या शैक्षणिक वाटचालीला हातभार लागावा, हा या उपक्रमामागील उद्देश आहे.
याअंतर्गत सोमवार, दि. १० ऑगस्ट २०२६ रोजी सकाळी ११ वाजता मनपा मुलींची मराठी केंद्रशाळा कॅम्प, सोलापूर-१३५२, उत्तर सदर बाजार, गांधी नगर, सी.पी. ऑफिसजवळ, सोलापूर येथे विद्यार्थिनींना वह्यांचे वाटप करण्यात येणार आहे.
तसेच त्याच दिवशी सायंकाळी ६ वाजता कुरुल रोड, साईनगर, मोहोळ येथील मूकबधिर निवासी शाळेत विद्यार्थ्यांना ड्रेस, वह्या आणि खाऊचे वाटप करण्यात येणार आहे. या उपक्रमामुळे विशेष गरजा असलेल्या विद्यार्थ्यांसह सर्वसामान्य विद्यार्थ्यांना शिक्षणासाठी प्रोत्साहन मिळणार आहे.
जयंतीनिमित्त केवळ अभिवादन न करता सामाजिक बांधिलकी जपत विद्यार्थ्यांच्या गरजा लक्षात घेऊन उपक्रम राबविण्यात येत असल्याने त्याला विशेष महत्त्व प्राप्त झाले आहे. शिक्षणाच्या माध्यमातून समाजातील गरजू घटकांना सक्षम करण्याचा संदेश या उपक्रमातून देण्यात येत आहे.
हा उपक्रम डॉ. सूर्यप्रकाश राजेश कोठे, एम.बी.बी.एस., एम.डी., डी.एम. (गॅस्ट्रोएन्ट्रोलॉजी), कन्सल्टंट गॅस्ट्रोएन्ट्रोलॉजिस्ट व जी.आय. एन्डोस्कोपीस्ट यांच्या माध्यमातून आयोजित करण्यात आला आहे. डॉ. कोठे यांच्या माध्यमातून सामाजिक उपक्रमांना हातभार लावला जात आहे.
जयंतीचा उत्सव सामाजिक उपक्रमातून साजरा करण्याची ही संकल्पना विद्यार्थ्यांच्या चेहऱ्यावर आनंद फुलविण्यासोबतच शिक्षणाची ज्योत अधिक प्रखर करण्याचा प्रयत्न ठरणार आहे.