झेडपीत वाढली खाबुगिरी ? निधी वाटपात भेदभाव, ग्रामपंचायत कर्मचाऱ्यांच्या पदोन्नतीलाही डावलले !
सदस्य दादासाहेब लवटे यांनी साधला जिल्हा परिषद प्रशासनावर निशाणा
सोलापूर व्हिजन | सोलापूर, दि.७ ऑक्टोबर
पंधराव्या वित्त आयोगाच्या निधी वाटपातील कथित असमानतेचा मुद्दा उपस्थित करतानाच ग्रामपंचायत कर्मचाऱ्यांच्या सेवाज्येष्ठतेनुसार पदोन्नतीचा प्रश्नही जिल्हा परिषद सदस्य दादासाहेब लवटे यांनी उपस्थित केला. ग्रामपंचायत स्तरावर वर्षानुवर्षे सेवा बजावणाऱ्या कर्मचाऱ्यांना त्यांच्या सेवाज्येष्ठतेनुसार पदोन्नती मिळत नसल्याचा आरोप त्यांनी केला. प्रशासनाच्या या कार्यपद्धतीमुळे कर्मचाऱ्यांमध्ये नाराजी निर्माण होत असल्याचेही त्यांनी नमूद केले.
पंधराव्या वित्त आयोगाच्या निधीच्या वाटपात सर्व सदस्यांना समान न्याय मिळत नसल्याचा आरोप करत लवटे यांनी प्रशासनाला लक्ष्य केले. “निधीत समानता द्यायची नसेल, तर मित्रपक्ष म्हणून कशाला घेता?” असा सवाल त्यांनी उपस्थित केला. विकासकामांसाठी उपलब्ध होणारा निधी ठरावीक भागापुरता मर्यादित न ठेवता सर्व भागांना समान निकषाने मिळावा, अशी मागणी त्यांनी केली.
याचवेळी ग्रामपंचायत कर्मचाऱ्यांच्या पदोन्नतीचा मुद्दाही त्यांनी पुढे आणला. सेवाज्येष्ठता, पात्रता आणि नियमांचा विचार करून पात्र कर्मचाऱ्यांना वेळेत पदोन्नती देणे अपेक्षित असताना प्रत्यक्षात त्याकडे दुर्लक्ष होत असल्याचा आरोप लवटे यांनी केला. वर्षानुवर्षे सेवा करूनही पदोन्नतीच्या प्रतीक्षेत असलेल्या कर्मचाऱ्यांना न्याय कधी मिळणार? असा प्रश्न त्यांनी उपस्थित केला.
अधिकाऱ्यांच्या कार्यपद्धतीवरही प्रश्नचिन्ह
जिल्हा परिषदेतील अधिकारी प्रत्येक बाबतीत खाबुगिरी करत असल्याचा गंभीर आरोपही लवटे यांनी केला. मात्र, त्यानंतरही कामे वेळेत आणि अपेक्षित पद्धतीने होत नसल्याचे त्यांनी म्हटले. त्यामुळे निधीचा वापर, विकासकामांची अंमलबजावणी आणि प्रशासकीय निर्णयप्रक्रिया यामध्ये पारदर्शकता आणण्याची गरज असल्याचे त्यांनी स्पष्ट केले.
प्रशासनाच्या कार्यपद्धतीवर प्रश्नचिन्ह
निधी वाटपातील समानता, ग्रामपंचायत कर्मचाऱ्यांना सेवाज्येष्ठतेनुसार पदोन्नती आणि प्रशासनातील कथित अनियमितता आढळून येत असल्याने जिल्हा परिषद प्रशासनाच्या कार्यपद्धतीवर राजकीय पातळीवरून प्रश्न उपस्थित झाला आहे. संबंधित प्रकरणांची चौकशी करून पात्र कर्मचाऱ्यांना पदोन्नतीचा लाभ द्यावा तसेच निधी वाटपासाठी स्पष्ट आणि समान निकष निश्चित करावेत, अशी मागणी देखील यावेळी सदस्य दादासाहेब लवटे यांनी केली आहे.