सोलापूर विधान परिषदेत भाजपचा झेंडा; राजेंद्र राऊत ३६५ मतांच्या दणदणीत फरकाने विजयी
महाविकास आघाडीला धक्का; स्थानिक स्वराज्य संस्थांमधील भाजपचे वर्चस्व पुन्हा अधोरेखित
सोलापूर व्हिजन
सोलापूर, दि. २२ जून
सोलापूर स्थानिक प्राधिकारी मतदारसंघाच्या विधान परिषद निवडणुकीत भारतीय जनता पक्षाने पुन्हा एकदा आपले राजकीय वर्चस्व सिद्ध करत भाजपचे उमेदवार राजेंद्र राऊत यांनी ३६५ मतांच्या मोठ्या फरकाने विजय मिळविला. राऊत यांना एकूण ४८३ मते मिळाली, तर राष्ट्रवादी काँग्रेस (शरदचंद्र पवार) पक्षाचे उमेदवार वसंतराव देशमुख यांना ११८ मतांवर समाधान मानावे लागले. या निवडणुकीत १३ मते अवैध ठरली.
जिल्हाधिकारी कार्यालयातील नियोजन भवन येथे सोमवारी सकाळपासून मतमोजणी प्रक्रिया पार पडली. सुरुवातीपासूनच भाजप उमेदवार राजेंद्र राऊत यांनी आघाडी घेतली होती. मतमोजणीच्या प्रत्येक टप्प्यात त्यांची आघाडी कायम राहिल्याने निकालाची दिशा स्पष्ट झाली होती. अखेर अधिकृत निकाल जाहीर होताच भाजप कार्यकर्त्यांनी जल्लोष करत विजयाचा उत्सव साजरा केला.
स्थानिक स्वराज्य संस्थांमधील सदस्यांच्या मतदानावर आधारित या निवडणुकीत भाजपला मिळालेला हा विजय आगामी जिल्हा परिषद, पंचायत समिती आणि स्थानिक स्वराज्य संस्थांच्या निवडणुकांच्या दृष्टीने महत्त्वाचा मानला जात आहे. महायुती सरकारच्या कामकाजावर स्थानिक प्रतिनिधींनी दाखविलेला विश्वास या निकालातून अधोरेखित झाल्याची प्रतिक्रिया भाजप नेत्यांकडून व्यक्त करण्यात आली.
दुसरीकडे, राष्ट्रवादी काँग्रेस (शरदचंद्र पवार) पक्षाला अपेक्षित यश मिळविता आले नाही. स्थानिक पातळीवरील राजकीय समीकरणे आणि संघटनात्मक ताकद यामध्ये भाजपने स्पष्ट आघाडी घेतल्याचे या निकालातून दिसून आले.
सोलापूर विधान परिषद मतदारसंघातील या विजयामुळे भाजपच्या गोटात उत्साहाचे वातावरण निर्माण झाले असून, जिल्ह्याच्या राजकारणात राजेंद्र राऊत यांची भूमिका अधिक प्रभावी होणार असल्याची चर्चा राजकीय वर्तुळात सुरू आहे.