सत्काराचे रूपांतर समाजकार्यात; ११ हजारांहून अधिक वह्या आणि कृषी साहित्याचे संकलन
इंद्रजीत पवार यांच्या आवाहनाला नागरिकांचा उत्स्फूर्त प्रतिसाद; आज गरजूंना होणार साहित्य वितरण
सोलापूर व्हिजन
राजकीय आणि सामाजिक क्षेत्रात सत्काराच्या पारंपरिक पद्धतींना फाटा देत समाजोपयोगी कार्याला प्राधान्य देण्याचा आदर्श उपक्रम राबविण्यात आला आहे. जनतेच्या विश्वासाला न्याय देत आणि समाजहिताचा संकल्प जपत मा. इंद्रजीत (भाऊ) पवार यांनी सत्कारासाठी हार, पुष्पगुच्छ किंवा शाल स्वीकारण्याऐवजी शालेय विद्यार्थ्यांसाठी शैक्षणिक साहित्य तसेच शेतकऱ्यांसाठी उपयुक्त कृषी साहित्य देण्याचे आवाहन केले होते. या अभिनव संकल्पनेला नागरिक, कार्यकर्ते आणि मतदार बंधू-भगिनींनी उत्स्फूर्त प्रतिसाद दिला.
या उपक्रमातून तब्बल ११ हजारांहून अधिक वह्यांचे संकलन झाले असून विविध प्रकारचे शेतीसाठी उपयुक्त साहित्यही मोठ्या प्रमाणावर जमा करण्यात आले आहे. शिक्षण आणि कृषी या समाजाच्या दोन महत्त्वाच्या घटकांना थेट मदत मिळावी, या उद्देशाने राबविण्यात आलेल्या या उपक्रमाचे सर्व स्तरांतून कौतुक होत आहे.
सत्कारासाठी खर्च होणारा निधी समाजाच्या गरजांसाठी वळविण्याची ही संकल्पना अनेकांसाठी प्रेरणादायी ठरत आहे. विशेषतः आर्थिकदृष्ट्या दुर्बल विद्यार्थ्यांना शैक्षणिक साहित्याची मदत आणि शेतकऱ्यांना शेतीसाठी आवश्यक साधनसामग्री उपलब्ध करून देण्याचा प्रयत्न सामाजिक बांधिलकीचे उत्तम उदाहरण मानला जात आहे.
दि. १५ जून २०२६ रोजी संकलित करण्यात आलेले साहित्य गरजू विद्यार्थी आणि पात्र लाभार्थ्यांना वितरित करण्यात येणार आहे. समाजातील प्रत्येक घटकाच्या विकासासाठी लोकसहभागातून उभारलेली ही चळवळ भविष्यात अशाच विधायक उपक्रमांना प्रेरणा देणारी ठरेल, असा विश्वास व्यक्त केला जात आहे.
“आपला विश्वास… हाच माझा संकल्प!” या ब्रीदवाक्याला साजेसा हा उपक्रम जनसहभागातून समाजपरिवर्तनाची नवी दिशा देणारा ठरत आहे.