“महापौर विजया’साठी देशमुख गट एकवटला! भाजपातील सत्तासंघर्ष शिगेला
सोलापूर महापौरपदासाठी भाजपात नवे समीकरण; देशमुख गटाची एकजूट, कोठे गट अडचणीत?
राजकारणात सर्व काही माफ? भाजपात महापौरपदासाठी पडद्यामागची खेळी
सोलापूर व्हिजन न्यूज
सोलापूर | दि. २७ जानेवारी
सोलापूर महानगरपालिका निवडणुका पार पडल्यानंतर आता खऱ्या अर्थाने राजकीय डावपेचांना सुरुवात झाल्याचे चित्र दिसत आहे. भाजपमधील दोन प्रभावी गट आमनेसामने येत असून, महापौरपदासाठी जोरदार सत्तासंघर्ष रंगताना दिसत आहे.
भाजपच्या महापौरपदाच्या शर्यतीत विनायक कोंड्याल आणि डॉ. किरण देशमुख ही नावे आघाडीवर असली, तरी पालकमंत्र्यांच्या सूचक वक्तव्यामुळे कोठे गटाचा नगरसेवक महापौरपदी विराजमान होणार असल्याचे संकेत मिळत होते. भाजपच्या अंतर्गत बैठकीतही तसाच सूर दिसून आला.
मात्र या बैठकीस देशमुख गटातील काही नगरसेवक अनुपस्थित होते. विशेष म्हणजे या बैठकीत डॉ. किरण देशमुख यांचीही अनुपस्थिती चर्चेचा विषय ठरली. यानंतर महापालिकेच्या राजकारणात नवे समीकरण आकारास येत असल्याची चर्चा सुरू झाली आहे.
महापौरपदावर आपलाच “विजय” व्हावा, यासाठी आमदार विजयकुमार देशमुख आणि सुभाष देशमुख यांच्या दोन्ही गटातील नगरसेवक एकत्र येत डॉ. किरण देशमुख यांच्या नावाची शिफारस पक्षश्रेष्ठींकडे केल्याचे सांगण्यात येत आहे. येत्या काही दिवसांत या निर्णयावर शिक्कामोर्तब होण्याची शक्यता वर्तवली जात आहे.
इतकेच नव्हे, तर आवश्यक संख्याबळ मिळवण्यासाठी इतर पक्षांतील नगरसेवकांनाही सोबत घेण्याची रणनीती आखली जात असल्याची माहिती राजकीय वर्तुळात चर्चिली जात आहे. यामध्ये एमआयएम पक्षातील नगरसेवकांना महत्त्वाची पदे देण्याची शक्यता असल्याची चर्चा भाजपच्या गोटात सुरू आहे. या सर्व घडामोडींमुळे कोठे गटाला मोठा धक्का बसण्याची शक्यता वर्तवली जात असून, “युद्धात, प्रेमात आणि राजकारणात सर्व काही माफ” ही म्हण पुन्हा एकदा खरी ठरत असल्याचे चित्र आहे.
दरम्यान, या संपूर्ण प्रकरणावर अंतिम निर्णय पक्षश्रेष्ठीच घेणार असून, सध्या यावर अधिकृत भाष्य करण्यास भाजप नेते टाळत असून त्यांचा मुखवटा किती काळ टिकतो, हे पाहणे औत्सुक्याचे ठरणार आहे.