राज्य सहकारी निवडणूक प्राधिकरण कार्यालयाकडून सविस्तर निवडणूक कार्यक्रम जाहीर
सोलापूर कृषी उत्पन्न बाजार समितीचे बिगुल वाजले ; दिवाळीत फुटणार फटाके
१० नोव्हेंबर रोजी मतदान तर ११ नोव्हेंबर रोजी निकाल….!
प्रतिनिधी / सोलापूर व्हिजन न्युज,
सोलापूर, दि. ४ ऑक्टोंबर – महाराष्ट्र राज्यातील दुसऱ्या क्रमांकाची बाजार समिती म्हणून ओळख असणाऱ्या श्रीसिद्धेश्वर सोलापूर कृषी उत्पन्न बाजार समितीच्या निवडणूकीची प्रक्रिया अखेर सुरू होणार असल्याची खात्रीशीर माहिती मिळत आहे. ऑक्टोंबर महिन्यात अर्ज स्वीकृती तर नोव्हेंबर महिन्यात मतदान असणार आहे. अशी माहिती जिल्हा उपनिबंधक कार्यालयाकडून सांगण्यात आली आहे. तसेच रीतसर आदेश राज्य सहकारी निवडणूक प्राधिकरण कार्यालयाचे सचिव अशोक गाडे यांच्या सहीनिशी जारी करण्यात आले आहे.
दरम्यान याबाबत सविस्तर निवडणुकीचा कार्यक्रम अधिकृतपणे घोषित करण्यात आला आहे. ७ ते ११ ऑक्टोबर दरम्यान अर्ज स्वीकृती होणार आहे. १० नोव्हेंबरला मतदान तर ११ नोव्हेंबर रोजी मतमोजणी करून निकाल घोषित करण्यात येणार आहे. तत्पूर्वी बाजार समितीमध्ये मतदारांची यादी प्रसिद्ध करण्यात येणार आहे. अर्ज स्वीकृतीनंतर अर्जांची छाननी दि.१४ व १५ ऑक्टोंबर रोजी करण्यात येऊन वैध अर्ज नोटीस बोर्ड लावण्यात येणार आहेत. त्यानंतर दी.१५ ते २९ ऑक्टोंबर पर्यंत अर्ज मागे घेण्याचे मुदत देण्यात आली आहे. तदनंतर दि.३० ऑक्टोंबर रोजी अंतिम उमेदवार यादी जाहीर करून चिन्ह वाटप कार्यक्रम निवडणूक कार्यालय येथे करण्यात येणार आहेत. त्यांचे प्रसिद्धीकरण बाजार समितीमध्ये असणाऱ्या नोटीस बोर्डवर करण्यात येईल.
शेवटी दि.१० नोव्हेंबर रोजी सकाळी ८ ते सायंकाळी ५ वाजेपर्यंत विविध मतदान केंद्रावर मतदान संपन्न होणार आहे. मतदान केंद्रांची यादी निवडणूक कार्यालयाकडून नंतर प्रसिद्ध करण्यात येणार आहे. दि.११ नोव्हेंबर रोजी सकाळी आठ वाजल्यापासून मतमोजणीस सुरुवात होणार असून त्याचे ठिकाण देखील नंतर कळवण्यात येणार आहे. मतमोजणी संपल्यानंतर रात्री उशिरा निकाल घोषित करण्यात येणार आहे. दरम्यान या निवडणूक प्रक्रियेसाठी जिल्हा उपनिबंधक किरण गायकवाड यांची मुख्य निवडणूक कार्यकारी अधिकारी म्हणून निवड करण्यात आली आहे. गायकवाड यांच्या देखरेखीखाली सोलापूर कृषी उत्पन्न बाजार समितीची निवडणूक प्रक्रिया संपन्न होणार आहे.
दरम्यान सोलापूर कृषी उत्पन्न बाजार समितीवर सध्या भाजपचे आमदार विजय देशमुख यांच्या गटाचे वर्चस्व आहे. तत्कालीन सभापती दिलीप माने आणि सुरेश हसापुरे यांनी भाजप काँग्रेस असा सुवर्णमध्ये साधून सभापती भाजपचा आणि सदस्य काँग्रेसचे अशा पद्धतीने आपली सत्ता बाजार समितीवर आणली. तत्पूर्वी आमदार विजय देशमुख यांना सलग तीनदा संचालक मंडळाची आणि सभापती पदाची मुदत वाढ मिळाली होती. अखेर सोलापूर कृषी उत्पन्न बाजार समितीची निवडणूक प्रक्रिया सुरू झाली असून याबाबत सविस्तर कार्यक्रम हे त्या दोन दिवसात जाहीर होणार असल्याची माहिती जिल्हा उपनिबंधक कार्यालयाकडून देण्यात आली आहे.
बाजार समितीच्या निवडणुकीमध्ये तत्कालीन सहकार मंत्री सुभाष देशमुख यांनी शेतकऱ्यांना मतदानाचा अधिकार दिला होता. त्यामुळे ती निवडणूक चांगलीच गाजली. तरीही त्यावेळी सुभाष देशमुख यांच्या पॅनलचा पराभव झाला होता. आता या निवडणुकीत सुभाष देशमुख आणि विजय देशमुख यांची भूमिका काय असणार याकडे सर्वांचे लक्ष राहणार आहे.
आगामी विधानसभा निवडणुकीसाठी इच्छुकांची भाऊगर्दी त्यामुळे बाजार समितीमध्ये समीकरण बदलण्याची चिन्हे..
आगामी विधानसभा निवडणुकीसाठी दक्षिण मतदारसंघातून विद्यमान आमदार सुभाष देशमुख, माजी आमदार दिलीप माने, श्री सिद्धेश्वर परिवाराचे धर्मराज काडादी, सुरेश हसापुरे,. अशा अनेकांनी इच्छा व्यक्त करत, आगामी विधानसभेची तयारी सुरू केली असल्याने यंदा बाजार समितीवर कोणाचे वर्चस्व राहील हे पाहणे उत्सुकतेचे ठरणार आहे.
उपनिबंधक कार्यालयाकडून आदेश प्राप्त झाल्यानंतर कार्यवाही
सोलापूर बाजार समितीचे निवडणूक कार्यक्रम जाहीर झाले आहे. याबाबत जिल्हा उपनिबंधक कार्यालयाकडून रीतसर सूचना व आदेश प्राप्त झाले आहेत. त्यानुसार आगामी निवडणुकीची कार्यवाही केली जाईल.
– मोहन निंबाळकर, प्रशासक सोलापूर कृषी उत्पन्न बाजार समिती.