हांडे अपहरण प्रकरणात चार आरोपींना चार दिवसांची पोलिस कोठडी
आरोपींकडे सापडले कोयता, कंडोम, साडी, फटाक्यांची माळ ; आरोपींचा होता झालेल्या अपमानाचा बदला घ्यायचा प्लान ? करणार होते व्हिडिओ व्हायरल
सोलापूर व्हिजन न्युज
सोलापूर प्रतिनिधी
सोलापुरातील गोपीचंद पडळकर यांचे समर्थक शरणू हांडे अपहरण व मारहाण प्रकरणातील चारही आरोपीना पोलिसांनी येथील जिल्हा व सत्र न्यायालयात हजर केले असता, न्यायालयाने आरोपींना ४ दिवसांची पोलीस कोठडी सुनावली आहे. याप्रकरणाच्या अधिकचा तपासासाठी पोलिसांनी आरोपीच्या ७ दिवसांच्या पोलीस कोठडीची मागणी केली होती. मात्र, पोलीस कोठडीच्या मागणीला आरोपीचे वकील अॅड.शरद पाटील यांनी युक्तिवाद करत विरोध केला. आरोपीकडून सर्व मुद्देमाल जप्त करण्यात आल्याने पोलीस कोठडी ऐवजी न्यायालयीन कोठडी द्यायची विनंती केली होती. दोन्ही बाजूचे युक्तिवाद येथील जिल्हा व सत्र न्यायालयाचे दहावे न्यायदंडाधिकारी वी.ए.कुलकर्णी यांनी ऐकून घेतले. त्यानंतर, आरोपी अमित सुरवसे, सुनील पूजारी, दीपक मेश्राम आणि अभिषेक माने या चौघाना ४ दिवसाची पोलीस कोठडी सुनावण्यात आली आहे. याप्रकरणी पुढील सुनावणी ही ( दि.१२) ऑगस्ट रोजी होणार आहे.
दरम्यान, भाजप आमदार गोपीचंद पडळकर आणि आमदार रोहित पवार यांच्या समर्थकांमधील वाद टोकाला पोहोचला असून काही दिवसांपूर्वी झालेल्या मारहाणीची व बदनामीचा बदला घेण्यासाठी रोहित पवार समर्थकांनी शरणू हांडेंचं अपहरण करत मारहाण केल्याचा संशय व्यक्त होत आहे. अपहरणाच्या घटनेबाबत माहिती मिळताच सोलापूर शहर पोलिसांकडून एम.आय.डी.सी.पोलिस ठाणे तसेच शहर गुन्हे शाखेचे तात्काळ ४ पथके आरोपींच्या शोधासाठी रवाना केली. जी.पी.एस. द्वारे आरोपींचा फिल्मी स्टाईलने पाठलाग करून त्यांना गाठले. अपहरण केलेल्या हांडे याला तावडीतून सोडवले.पुढील उपचारासाठी त्यांना शासकीय रुग्णालयात दाखल करण्यात आले. एम.आय.डी.सी. पोलिसांनी तात्काळ चार ही आरोपींना अटक करुन न्यायालयात हजर केले. मात्र, आरोपींकडून साडी, फटाक्यांची माळ, कंडोम आणि ट्रायपॉड असं साहित्य जप्त करण्यात आलं आहे. त्यामुळे, आरोपींकडून जप्त करण्यात आलेलं साहित्य नेमकं कशासाठी होतं असा प्रश्न अनेकांना व पोलिसांनाही पडला आहे.
आमदार गोपीचंद पडळकर यांच्या वाहनावर दगडफेक करणाऱ्या रोहित पवारांच्या समर्थकाना बेदम मारहाण केल्याची घटना साधारणपणे मे महिन्यात घडली होती. विशेष म्हणजे या मारहाणीचा व्हिडीओ तयार करून सोशल मीडियावर व्हायरलही करण्यात आला होता. यापुढे पडळकरांच्या विरोधात काही कृत्य केल्यास त्याला अशाचप्रकारे धडा शिकवला जाईल, अशी धमकीही त्यावेळी पडळकर समर्थकांनी दिली होती. या घटनेमुळे पवार समर्थकांची मोठी बदनामी झाली, पण कुठलीही पोलीस तक्रार न करता, त्यांनीही जशास तसे उत्तर देण्याचं मनाशी ठरवलं अन् त्यातूनच, मारहाण करणाऱ्या शरणू हांडेचे अपहरण करुन व्हिडिओ बनविण्याचा प्लॅन आखला होता का? अशी शंका व्यक्त होत आहे.
शरणू हांडे अपहरण प्रकरणात विविध वस्तू पोलिसांच्या हाती लागल्या आहेत. पोलिसांनी आरोपींकडून साडी, ट्रायपॉड, फटाक्यांची माळ आणि कंडोमची पाकिटेही जप्त केल्याने खळबळ उडाली आहे. त्यामुळे, आरोपींचा नेमका काय प्लॅन होता, असा प्रश्न उपस्थित होत आहे. मात्र, ज्याप्रमाणे काही दिवसांपूर्वी व्हायरल झालेल्या एका व्हिडिओतून रोहित पवार समर्थकांची बदनामी करण्यात आली होती, त्याचप्रमाणे पडळकर समर्थकांची बदनामी करायची होती का? व्हिडिओ बनवून तो व्हायरल करायचा असल्यानेच ट्रायपॉडसह, साडी अन् कंडोमची पाकिटेही आरोपींनी बाळगली होती का? अमितने शरणूला साडी नेसवून, त्याचे केस कापून तसेच फटाके फोडून त्रास देणे आणि या सगळ्याचा व्हिडिओ करून अपमानाचा बदला अपमानाने घ्यावा, असा तर हेतू बाळगला नव्हता ना? असा प्रश्न या निमित्ताने उपस्थित झाला आहे. या हांडे अपहरण व मारहाण प्रकरणात पोलिसांनी कोणतीही अधिकृत माहिती दिलेली नाही.