हमाल माथाडी कामगारांनी केले कामबंद करत केली निदर्शने…..!
बाजार समितीच्या आवारात सर्वत्र शुकशुकाट….
टप्पा दुरुस्तीचा ठराव रद्द करण्यासह घरकुलाची मागणी…
प्रतिनिधी / सोलापूर व्हिजन न्युज ,
सोलापूर , दि. १० सप्टेंबर – सोलापूर कृषी उत्पन्न बाजार समितीमध्ये कार्यरत असणाऱ्या हमाल मापडी कामगारांनी आंदोलन आता तीव्र स्वरूपाचे केले आहे. टप्पा दुरुस्तीचा ठराव रद्द करण्याच्या मागणीकडे प्रशासन गांभीर्याने विचार करत नसल्याने, बाजार समितीत कार्यरत असणाऱ्या सोलापूर जिल्हा हमाल , मापाडी , माथाडी श्रमजीवी कामगार समन्वय समितीने मंगळवारी कामबंद आंदोलन करत कृषी उत्पन्न बाजार समितीच्या प्रमुख प्रवेशद्वारासमोर निदर्शने केली.
आपल्या प्रलंबित मागण्यांच्या पूर्ततेसाठी हमाल , मापडी , माथाडी श्रमजीवी कामगार समन्वय समितीने प्रशासनाला सोमवार ( दि. ९ ) सप्टेंबर पर्यंतचा अल्टिमेटम दिला होता , परंतु समन्वय समितीच्या झालेल्या बैठकीत प्रशासनाला या प्रश्नावर विचारविनिमय करण्यासाठी आणि तोडगा काढण्यासाठी आणखीन एक दिवस मुदतवाढ दिली आहे. त्यामुळे कामगारांनी सोमवार ऐवजी मंगळवार ( दी. १० ) सप्टेंबर पासून काम बंद करण्याचा इशारा दिला. होता. त्यानुसार आज मंगळवारी सकाळपासून बाजार समितीमधील कांदा फळ आणि भुसार विभाग पूर्णतः बंद ठेवून निर्णयाचा तीव्र निषेध नोंदवण्यात आला.
दरम्यान कांदा सेलहॉल मधील कांद्याचे लिलाव संपूर्णपणे बंद ठेवण्यात आल्याने सर्वत्र शुकशुकाट होता. तर फळ विभागात देखील कोणताही व्यवहार झाला नाही. भुसार विभागात काही अडत व्यापाऱ्यांनी दुकाने बंद ठेवली होती. तर काहींनी दिकाने उघडले, परंतु कामगारच कामावर नसल्याने कोणत्याही व्यवहार झाले नाहीत. संबंधित बाजार समिती प्रशासकीय कार्यालय, जिल्हा उपनिबंधक कार्यालय, पोलीस आयुक्त कार्यालय, कामगार आयुक्त कार्यालय, या प्रशासकीय कार्यालयांना यासंबंधीचे पत्रव्यवहार करून कामबंद आंदोलन करण्यासंबंधी कळवण्यात आले होते.
संघटनेच्या वरिष्ठ पातळीवरून याबाबत चर्चा आणि बैठक संपन्न झाली. त्यानंतर यावर अंतिम निर्णय घेऊन सदरचे कामबंद आंदोलन करण्यात आल्याचे यावेळी संयुक्त समितीच्या वतीने सांगण्यात आले आहे.
कामबंद आंदोलनात सहभागी संघटना
*माता रमाई संघटना
*माथाडी कामगार विकास मंडळ
*फ्रुट कामगार संघटना
*लाल मिरची कामगार संघटना
*माथाडी कामगार संघ
टप्पा दुरुस्ती मागणी ही न्यायप्रविष्ठ बाब..
हमाल माथाडी माथाडी कामगारांच्या टप्पा दुरुस्तीची मागणी ही न्यायप्रविष्ठ बाब आहे. यामध्ये जिल्हा उप निबंधक कार्यालयाकडून सूचना दिल्या आहेत. बाजार समिती प्रशासन यामध्ये कोणताही निर्णय घेऊ शकत नाही. कामगारांनी त्यांच्या कामाचा मोबदला माथाडी बोर्डात भरावा, अडत व्यापाऱ्याकडून रोखीने व्यवहार करू नये. वास्तविक पाहता राज्यामध्ये हमाली १ रुपया ५० पैसे इतकी असताना , सोलापूर कृषी उत्पन्न बाजार समितीमध्ये हमाली १ रुपया ९० पैसे इतकी आहे.
– दत्तात्रेय सूर्यवंशी , सचिव कृषी उत्पन्न बाजार समिती सोलापूर.
* हमालीचे टप्पे *
१ ते १० किलोसाठी – ३८ पैसे
११ ते ३० किलोसाठी – १.रू. १४ पैसे
३१ ते ५० किलोसाठी – १. रु. ९० पैसे
कामगारांना पाहिजे सरसकट हमाली – १.रू.९० पैसे
कामबंद करत निदर्शने देऊन नोंदवला निषेध..
शासन आणि प्रशासन कामगारांच्या मागण्यांकडे जाणीवपूर्वक दुर्लक्ष करत आहे. आंदोलन सुरू करून अनेक दिवस उलटले तरी देखील यावर निर्णय होत नसल्याने , शेवटी कामबंद करण्याचा निर्णय घेण्यात आला आहे. त्यानुसार मंगळवार ( दी. १० ) सप्टेंबर रोजी सकाळपासून कांदा विभाग , भुसार – आडत विभाग , आणि फळ विभागातील सुमारे दोन हजार कामगार आपले कामबंद ठेवले आहेत. केवळ अत्यावश्यक असणारे भाजीपाला विभाग सुरू ठेवण्यात आला होता.
– भिमा सिताफळे, उपाध्यक्ष कामगार समन्वय समिती सोलापूर.
*कामगारांच्या प्रमुख मागण्या*
१) भुसार बाजाराकरीता लागू करण्यात आलेला टप्पा दुरुस्तीचा ठराव रद्द झाला पाहिजे.
२) संपूर्ण माथाडी कामगाराच्या हमाली तोलाईचा भरणा माथाडी बोर्डात झाला पाहिजे.
३) माथाडी कामगाराकरीता घरकुल व प्राथमिक उपचार केंद्र झालेच पाहिजे.
४) कांदा विभागामधील माल राखणे बंधनकारक करु नये.